السلام عليكم و رحمة الله تعالى و بركاته بصفتي اجتزت مرحل الباكالوريا العام الماضي و الحمد لله وفقني الله تعالى . اقدم لكم بعض التعليمات
على كل تلميذ التقيد بها لانها مفتاح النجاح و من جهة بعض الاخطاء التي يرتكبها كل تلميذ التي عليكم تجنبها منذ البداية . و لتعلموا ان كل تلميذ مادام وصل لمرحلة الباك باستطاعه النجاح و هذا لامتلاكه
القدرات الكافية فقط عليه باستغلالها من اجل النجاح ♥
اولا : الباك : ما هو الباك ؟: صدقوني ماهو الا امتحان كباقي الامتحانات التي مرت علينا سواءا في
مرحلة الابتدائي او المتوسط فقط الفرق بينهما يتجلى في المستوى و تاكدوا ان مواضيع الامتحان ستكون
فقط في المجال الدراسي المقرر في السنة .
ثانيا : متى يبدا التحضير ؟ : هناك عبارة يقولها كل تلميذ الا و هي :
سابدا التحضير للباك من يوم الغد و لكن للاسف يوم بعد يوم و الجملة نفسها يراودها كل تلميذ مقبل للامتحان ( حتى انا كنت نقولها )
غدا غدا غدا .... الايام تمر ... الدروس تتراكم ..... الامتحان يقترب ... يبقى الوقت ضيق و حان
دور القلق و الخوف ( منيش مريفيزي .. الباك قرب ... باينة منجيبش الباك .. الي قرا قرى في
اكتوبر .... و هنا يقع التلميذ في مشكل و يسيطر عليه القلق و بالتاكيد راح يسببلوا مشاكل في ايام
الامتحان .
يا حبيبي علاه متديش في كل يوم نصف ساعة من وقتك تراجع فيها دروسك و تسهل على روحك
بصراحة علابالي بلي صعيب الشي و يدخل فيها الشيطان بصح الله ينعلوا و يغزيه مع الوقت توالفوا هذا البرنامج و
تبداو تريفيزو كل يوم و نورماااااال.و اكيد المراجعة كل يوم عندها دور كبير في نجاح التلميذ
و علابالكم كاين فرق بين التلميذ لي يراجع كل يوم و لي يراجع بسمانة قبل الباك .
ما هو الفرق ؟:انا العام لي فات بصراحة كنت العام كامل متهاون نتغيب , منراجعش , مش مهتم و عاطي القراية
بطالون. ...و كي ولا الباك على الابواب صبت روحي حاصل. واش نريفيزي و واش نخلي كيما
الرياضيات معنديش اصلا كراس. وهذي لي نوصيكم عليها الرياضيات و المواد لي عندها معامل
ضعيف هي لي تعاون و طلعلكم المعدل . وما تستهزاوش بيهم . المهم في الاخير صح جبت الباك
بصح جبتو بمعدل 10 و التلاميذ لي تعبوا و راجعوا طوال العام الدراسي جابوه بمعدل شباب الله يبارك
هاذا هو الفرق بسكو الباك مكان والو 10 جيبوه كي صباح الخير بصح لي حاب معدل مليح و يساعدوا
في الجامعة لازملو يبذل جهد و يقرا من النهارات اللوالة. و صدقوني والله لي يتعب و يجتهد باذن الله
ينال و ينجح و يوفقوا ربي .
ثالثا : ايام الامتحان : صدقوني اجمل مرحلة تعيشوها في حياتكم سيرتو كي تبداو تجوزو في الامتحان
صح يكون نهار لول شوية ستراس بصح يروح عليكم بسكو راح يوفرولكم كلش في مقر الامتحان
و اسئلة المواضيع ديما تكون في واش قريتو العام كامل و نوصيكم اعتمدو على الذكاء متتكلوش
على الحفيض بزاف . حاولوا ديما في ورقة الاجابة توظفوا مصطلحات لها علاقة بالمادة و كونو اذكياء
في الاجابة واذا كنت مش عارف الاجابة متخليهاش بيضة عمر الورقة و استخدم ذكائك في الاجابة
و متنساوش كل مادة اعطولها حقها و نهارات الباك متعبوش نفوسكم بزاف حاولو تكونوا ديما متفائلين
و توكلوا على ربي و ادعوا ربي باش يوفقكم . و لي تجي من عند ربي قاع فيها الخير .
اخيرا : مرحلة النجاح : الباك ... صدقوني و الله لاتوجد فرحة تقابل فرحة النجاح في الباكالوريا
سيرتو كي تشوفو والديكم و العائلة كامل فرحانين بيكم و المويمة تزغرت عليكم .. لحضات لا تنسى
حقا.و علابالكم لي يجيب الباك بزاف ابواب يتفتحولوا معناه هو مستقبل التلميذ .
اسمحولي طولت عليكم . الله غالب هذا هو الابك معاه الهدرة تطوال .
في الاخير اتمنى و ادعوا الله عز و جل ان يوفقكم جميعا و يدخل الفرحة في قلوبكم و في بيوتكم
ملاحظة : لي ميكتبلوش ربي و ميجيبوش مهيش لافان دي موند ميفقدش الامل بالعكس يعاود عليه
و ان شاء الله ربي يوفقوا في المرة الثانية . لان الدنيا مكاتيب . و لازم علينا نرضاو بواش كتبولنا ربي
ربي يوفق طلاب الباكالوريا جمييييييييييعا ********** امين يا رب **
♥ ♥ ♥ انظروا كم هي جميلة ♥ ♥ ♥
=
=
=
ادعوا لكم من كل قلبي ان شاء الله الكل يتحصل عليها ......... ان شاء الله يا رب
=
=
ربي معاكم
